【一句到尾，有無移民打算？】
自從英國同澳洲開聲降低香港人移民門檻，對於一直認為移民係遙不可及嘅人，腦海裏不期然閃出一句「其實……我係咪都可以移民呢？」
對比起之前嘅移民政策，兩國移民門檻的確降低咗唔少，但就未至於低到三姑六婆話想移就移到嘅。英國冋澳洲草案都先以住5年為基礎，英國方面：BNO持有人免簽證逗留英國延長到5年，5年後申請定居身份，再1年後申請入籍成為公民；澳洲方面：畢業生簽證同臨時工作簽證額外延長5年，之後再申請永久居留權。
我自己就咁樣睇，本身具備移民能力同計劃嘅朋友，新政策會加快佢哋移民步伐；但如果本身欠缺移民能力，例如財力抑或工作能力，新政策唔會令佢哋無啦啦由「不可能移民」變成「可能移民」。就以移民英國做例子，住6年後申請成為公民，最壞情況去到當地6年無收入，即係至少要有6年生活費 + 6年住屋支出做流動現金儲備，仲有每星期一次clubbing同入場睇英超呢？諗起頭都大埋。
不過香港人出晒名轉數快、適應力強、肯搏肯捱，我勸你揀得移民去外國，就唔好諗住做暴發户「用錢買身分」，或者貪人哋國家福利一味靠痴喇！作為香港人，去到就堂堂正正搵嘢做，再融入當地文化生活，咁先對得住「香港人」呢個國際品牌。所以話，有心想移民唔係問題，但就唔好移民得太肉酸。有錢嘅，去到當地搞下小生意，請下自己人同時振興當地經濟；無錢嘅，花幾年時間發展成專業人士，或者學門手藝考一兩個實用牌，去到當地重新出發闖過世界喇！
Search